في ليلة ٢٧ أكتوبر سنة ٢٠٢٠.. ريال مدريد كان مغلوب بين الشوطين قدام فريق ألماني اسمه بوروسيا مونشندلادباخ في دوري أبطال أوروبا.
ولما جه وقت نزول اللاعيبة عشان يبدأوا الشوط التاني.. الكاميرات لقطت نجم فريق ريال مدريد كريم بنزيما وهو بيكلم زمايله وبيقولهم ميباصوش الكورة ل زميلهم في الفريق ڤينيسيوس چونيور.. عشان – علي حد كلامه – ڤينيسيوس بيلعب ضدهم مش معاهم!
ڤينيسيوس لاعب برازيلي واعد.. وقتها كان لسة عنده ٢٠ سنة.
وكان بدأ بداية ضعيفة جدًا مع الفريق لأنه كان المهاجم وكان بيضيع فرص كتير جداً وبيسجل أهداف قليلة.. وده راجع ل قلة الخبرة اللي عنده وقلة ثقته بنفسه والضغط اللي عليه بسبب أنه بيلعب في فريق كبير محتاج يثبت فيه نفسه.
وده خلى الجمهور يقلب عليه وزمايله كمان في الفريق يتهموه ب أنه بيلعب ضدهم.
بعد الموقف ده وتسريب الصحافة ل كلام بنزيما مع زمايله على ڤينيسيوس.. اضطر بنزيما أنه يعتذر عن اللي قاله.. لكن ده بعد ما رأيه في زميله الشاب اتعرف خلاص.
لكن اللي حصل بعد كده غريب جدًا!
من بعد الموقف ده.. كريم وڤينيسيوس كانوا بينزلوا كل ماتش يلعبوه مع بعض وبيقدموا أداء قوي جدًا وبيسجلوا أهداف كتير.. للدرجة اللي فيها على مدار موسمين كمان بعدها.. يحققوا سوا لقب الدوري الأسباني مرتين.. والسوبر الأسباني.. والسوبر الأوروبي.. ويحققوا دوري أبطال أوروبا
ومين اللي سجل هدف الفوز في النهائي؟
أيوه أنت صح: ڤينيسيوس چونيور!
و مع نهاية الموسم بنزيما حقق لقب أفضل مهاجم وأفضل لاعب في أوروبا.. وڤينيسيوس أخد جائزة أحسن لاعب شاب في أوروبا.
و الصحافة بتتكلم النهارده على أن الثنائية دي هي أقوى ثنائية هجومية في العالم حاليًا.
خلي بالك من الناس اللي معاك في الفريق اللي ممكن تكون مستقل ب امكانياتهم أو شايف أن ملهومش دور كبير.
خلي بالك من اللي أنت فاكر أنه أكبر نقطة ضعف عندك أو اللي ممكن يكون سبب خسارتك.
خلي بالك.. لأنه ممكن بتشجيعك وثقتك فيه تحوله ل أكبر مكسب لك.. و يكون سبب فوزك بالكامب!
ديفيد قدسي